ერთი კვირის წინ, არასამთავრობო ორგანიზაცია „კიევპრაიდმა“ გამოაცხადა, რომ 23-24 ნოემბერს გამართავს საქველმოქმედო საგანმანათლებლო ფესტივალს სახელწოდებით „ქვიარ პროპაგანდა ფესტი“. ეს თარიღი ჰოლოდომორის მსხვერპლთა ხსოვნის დღეს ემთხვევა, რომელიც ყოველწლიურად ნოემბრის მეოთხე შაბათს აღინიშნება. საზოგადოების აღშფოთების მიუხედავად, ორგანიზატორები ღონისძიებას არც გააუქმებენ და არც გადადებენ.

ამის შესახებ „კიევპრაიდის“ „ინსტაგრამ“ პოსტი იტყობინება.

„მადლობას ვუხდით ყველას, ვინც თავისი აზრი გამოთქვა და გვსურს ვუპასუხოთ ყველაზე აქტუალურ კითხვებს. ფესტივალის ღონისძიებები ისე დავგეგმეთ, რომ ღირსშესანიშნავი თარიღები არ შეგვიმოწმებია. დღეს ამას არ გავაკეთებდით, მაგრამ 23-24 ნოემბრისთვის დაგეგმილი ფესტივალი, ხსოვნის ტრადიციისთვის პატივისცემით გამოხატვით, მაინც გაიმართება. დეტალურ განრიგს უახლოეს მომავალში გამოვაქვეყნებთ!“, – აცხადებენ „კიევპრაიდის“ ორგანიზატორები.

მათივე თქმით, ფესტივალის ყველა მონაწილე წუთიერი დუმილით შეუერთდება გენოციდის მსხვერპლთა ხსოვნის პატივსაცემად გამართულ კამპანიას „აანთეთ მეხსიერების სანთელი“.

„ჩვენ ერთდროულად ვართ ლგბტქ+ საზოგადოების წარმომადგენლები და უკრაინელები – ორივე ეს იდენტობა ჩვენთვის მნიშვნელოვანია“, – ხაზს უსვამს „კიევპრიდი“.

აღსანიშნავია, რომ „პროპაგანდა ფესტი“ არის საგანმანათლებლო ღონისძიება ლექციის ფორმატში და არა წვეულება, კონცერტი ან აღლუმი. მისი მიზანია ლგბტქ+ საზოგადოების განათლების დონის ამაღლება, ასევე სახსრების მოზიდვა უპილოტო საფრენი აპარატების დისტანციური მართვის სისტემების შესაძენად, რადიოელექტრონული ომის საჭიროებებისთვის და მედიკამენტებისთვის, რომელიც სამხედრო მოსამსახურეებს ესაჭიროებათ.

გარდა ამისა, არასამთავრობო ორგანიზაციამ განმარტა ფესტივალის სახელწოდებაც, რომელსაც ასევე აქტიურად აკრიტიკებენ: „კიევპრაიდის“ განცხადებით, „ქვიარ პროპაგანდა“ წარმოადგენს ირონიას იმასთან დაკავშირებით, რაც ლგბტქ+ ადამიანებს მუდმივად ესმით მათი იდენტობის შესახებ. ამით ორგანიზატორებს სურდათ ეჩვენებინათ, რომ რომელიმე ორიენტაციის პროპაგანდის არ სჯერათ.

„ასევე გასათვალისწინებელია, რომ სიტყვა „პროპაგანდა” აღიქმება, როგორც „რუსული ფსიქოლოგიური ოპერაციის“ (PSYOP) სინონიმი. დღესდღეობით ბევრი ნაცნობი სიტყვა ახალ მნიშვნელობას იძენს – ვწუხვართ, თუ ვინმეს ვაწყენინეთ! ბოდიშს გიხდით და ხაზს ვუსვამთ, რომ ფესტივალის ღონისძიებები მიზნად ისახავს მხოლოდ საღი აზრისა და კრიტიკული აზროვნების პოპულარიზაციას!“ – ნათქვამია „კიევპრაიდის“ შეტყობინებაში.