ცოტა ხნის წინ დემი მურმა 62 წლის იუბილე აღნიშნა. ბრწყინვალე კარიერისა და უამრავი თაყვანისმცემლის პარალელურად, მსახიობს ცხოვრებაში არაერთი სირთულე და დაბრკოლება შეხვდა, რამაც ნერვულ აშლილობამდე და სერიოზულ დაავადებებამდე მიიყვანა.

დემი მურის ცხოვრებაში ერთ-ერთი ყველაზე დიდი სკანდალი ეშტონ კატჩერთან ქორწინებას უკავშირდება. წყვილი ოფიციალურად 2013 წელს განქორწინდა. თუმცა, იქამდე 2 წლით ადრე დაშორდნენ ერთმანეთს. დემი მურისთვის ეს განქორწინება საკმაოდ მტკივნეული აღმოჩნდა, ეშტონმა კი პირად ცხოვრებაში სიახლეები მალევე გააგრძელა.

მსახიობი 62 წლის ასაკში იდეალურად გამოიყურება და ახლა შემოქმედებითადაც ძალიან აქტიურია. თუმცა, წლების განმავლობაში მური ეკრანებიდან თითქმის საერთოდ გაქრა. გავრცელებული ინფორმაციის თანახმად, ის კატჩერს რამდენიმე წლის განმავლობაში ტკივილით სავსე მესიჯებს სწერდა და სთხოვდა, რომ მასთან დაბრუნებულიყო. აღსანიშნავია, რომ კატჩერი ამ დროს უკვე მსახიობ მილა კუნისზე იყო დაქორწინებული. ასევე, გავრცელებული ინფორმაციის თანახმად, დემი მური ფსიქოლოგებთან, სულიერი პრაქტიკის სპეციალისტებთან და ექიმებთან აქტიურად დადიოდა.

მრავალწლიანი ტკივილისა და საკუთარ თავზე დაკვირვების შედეგად, დემი მურმა 2019 წელს გამოუშვა წიგნი, სახელწოდებით: “Inside Out”.

წიგნში დემი მურმა აღწერა, როგორ გადაიქცა ჰოლივუდის ერთ-ერთ ყველაზე მაღალანაზღაურებად და პოპულარულ მსახიობად, როგორ შეუყვარდა ბრიუს უილისი, გახდა 3 ქალიშვილის დედა, შეეწინააღმდეგა დაბერების პროცესს, როგორ შეხვდა 15 წლით უმცროს ეშტონ კატჩერს, შეუყვარდა მთელი გულით და როგორ გადაიტანა მასთან განშორება. მური მკითხველს უყვება, რა გზა გაიარა დაცემიდან ფეხზე წამოდგომამდე.

დემი მური ამბობს, რომ არ სურს, ვინმე რაიმეში დაადანაშაულოს ან მსხვერპლის როლში წარმოჩინდეს. უბრალოდ, მსახიობს უნდოდა, საკუთარი განვლილი გზის შესახებ სხვებსაც გაეგოთ…

ეშტონ კატჩერისა და დემის მურის წყვილს ბევრი გულშემატკივარი ჰყავდა. გარედან ჩანდა, რომ ყველაფერი კარგად იყო და მათ იდეალური ურთიერთობა და დიდი სიყვარული ჰქონდათ. თუმცა, მურის მემუარებმა აჩვენა, რომ ამ “იდეალური” ურთიერთობის მიღმა არაერთი ისეთი ფაქტი იმალებოდა, რამაც მსახიობი განსაკუთრებით დააზიანა.

დემი მური და ეშტონ კატჩერი ერთმანეთს 2003 წელს, ნიუ-იორკში შეხვდნენ. იმ პერიოდში, მური ბრიუს უილისთან უკვე განქორწინებული იყო, ეშტონი კი ბრიტანი მერფის ხვდებოდა. თუმცა, საერთო მეგობრების დახმარებით, ერთ-ერთ რესტორანში მან მური გაიცნო. როგორც მოგვიანებით აღნიშნეს, მათ შორის ნაპერწკალი მაშინვე გაჩნდა და მთელი საღამო ისაუბრეს.

ნიუ-იორკიდან ორივე ლოს-ანჯელესში გადავიდა და ერთმანეთის ნახვას სულ უფრო ხშირად ახერხებდნენ. იმ დროს ეშტონ კატჩერი განსაკუთრებული პოპულარობით სარგებლობდა და უამრავი თაყვანისმცემელი ჰყავდა. დემი მურიც იდეალურად გამოიყურებოდა.

რომანი ისე სწრაფად განვითარდა, რომ წყვილს ჰოლივუდის სიფრთხილის ყველა ზომა დაავიწყდა. ამიტომაც, მათ კალათბურთის თამაშებზე, ფილმების პრემიერებზე და წვეულებებზე ერთად მისვლა დაიწყეს. კამერების წინ თამამად პოზირებდნენ, ერთმანეთის მიმართ სიყვარულს გამოხატავდნენ…

დემი მური ეშტონს ბედის საჩუქრად აღიქვამდა და ამბობდა, რომ ის ახალგაზრდობის გახანგრძლივებაში ეხმარებოდა და ძველი ტკივილების დავიწყებაში. მური ხომ ბავშვობიდან საკმაოდ მძიმე პირობებში იზრდებოდა. მისი ოჯახი სიღარიბის ზღვარზე იყო და საჭმლის პრობლემა სულ ჰქონდა. მამა ალკოჰოლიკი იყო, დედას კი ფსიქიკური პრობლემები ჰქონდა. 14 წლის იყო, როდესაც მამასთან ერთად დედა თავის მოკვლის მორიგი მცდელობის შემდეგ ძლივს გადაარჩინა. როგორც ცნობილია, მაშინ მური ცდილობდა, დედის პირიდან აბები ამოეღო, მამას კი ნახევრად მკვდარი სხეული ეჭირა… ეს დემი მურის მძიმე ბავშვობიდან მხოლოდ მცირე დეტალია. მოგვიანებით მსახიობმა თქვა, რომ სწორედ მაშინ მიხვდა, რომ ბავშვობა დასრულდა.

პარალელურად, ალკოჰოლთან და არალეგალურ ნივთიერებებთან დამოკიდებულების პრობლემა გაუჩნდა. 15 წლის ასაკში კი დედის თანხმობით ერთ-ერთმა მამაკაცმა გააუპატიურა. როგორც ცნობილია, დემი მურის დედამ ქალიშვილის გაუპატიურებაში 500 დოლარი აიღო..

16 წლის ასაკში მური სახლიდან გაიქცა და მეგობარ ბიჭთან გადავიდა საცხოვრებლად. ორი წლის შემდეგ მუსიკოს ფრედი მურს გაჰყვა ცოლად. თუმცა, ეს ქორწინება უიღბლო აღმოჩნდა. დაქორწინებიდან რამდენიმე დღეში დემი მურს მეუღლემ უღალატა. პარალელურად, ის ფილმებში შიშველი სცენების გადაღებას დასთანხმდა და დიდი პოპულარობა მოიპოვა. ფრედი მურთან განქორწინების შემდეგ, დემის არაერთ მამაკაცთან რომანს მიაწერენ. ერთ დღეს ის მსახიობ ბრიუს უილისს შეხვდა და ასე ჩამოყალიბდა ჰოლივუდის ერთ-ერთი ყველაზე პოპულარული და განხილვადი წყვილი…

მური და უილისი ერთმანეთს 2000 წელს დაშორდნენ. მათ 3 ქალიშვილი შეეძინათ და დაშორების შემდეგ, მეგობრული ურთიერთობა შეინარჩუნეს. მეტიც, ბრიუს უილისი დემი მურისა და ეშტონ კატჩერის ქორწილშიც კი იყო.

როდესაც დემი მური ეშტონ კატჩერს შეხვდა, 40 წლის იყო, ეშტონი კი – 25-ის. მსახიობი ფიქრობდა, რომ სწორედ ახლა ჰქონდა იმ წლების აღდგენის შესაძლებლობა, რომლებიც არასწორ ადამიანებთან ყოფნისა და სხვადასხვა ნივთიერებაზე დამოკიდებულების გამო გამოტოვა.

ეშტონი და დემი ოფიციალურად 2005 წელს დაქორწინდნენ. 41 წლის ასაკში მური დაორსულდა და ეს სამყაროსაგან კიდევ ერთ საჩუქრად მიიღო. თუმცა, სამწუხაროდ, მსახიობს ორსულობის მე-6 თვეს მუცელი მოეშალა… მაშინ წყვილს ამის შესახებ არაფერი უთქვამს, თუმცა წლების შემდეგ გავრცელდა ინფორმაცია, რომ სპონტანური აბორტი მურისთვის ძალიან მტკივნეული აღმოჩნდა და მავნე ნივთიერებებზე დამოკიდებულებას კვლავ დაუბრუნდა. მსახიობს ძალიან უნდოდა, რომ ეშტონისაგან შვილი ჰყოლოდა.

ეშტონი რთულ დროს მეუღლის გვერდით იდგა. წყვილი ხელოვნურ განაყოფიერებას მიმართავდა, თუმცა მცდელობები უშედეგოდ დასრულდა….

თანდათან დემის გაუჩნდა ეჭვები, რომ ეშტონიც მიატოვებდა. დაიწყო ტაბლოიდების კითხვა და სათაურებზე, რომ ეშტონმა ცოლად “ბებია” მოიყვანა, განსაკუთრებით ნერვიულობდა. ეშტონს განსხვავებული სექსუალური ფანტაზიები ჰქონდა და როგორც მოგვიანებით გავრცელდა ინფორმაცია, დემი მური დასთანხმდა, რომ 3 ადამიანს ერთად ჰქონოდა სექსი. მსახიობი ფიქრობდა, რომ ამ გზით მეუღლის ინტერესს შეინარჩუნებდა. ამიტომაც, მათ საწოლში სხვა ქალებიც გაჩნდნენ…

ამის პარალელურად, გავრცელებული ინფორმაციით, ეშტონმა დემი მურს ორ ქალთან – ბრიტნი ჯონსთან და სარა ლილთან უღალატა. 2011 წელს ბრიტნი ჯონსის მსგავსად, სარა ლილმა US Weekly-ს ეშტონთან რომანის ამბები მიჰყიდა. მაშინ ეშტონი ჯერ კიდევ დემი მურზე იყო დაქორწინებული.

მური ცდილობდა, ეს ამბავი დაევიწყებინა. მეტიც, სკანდალის შემდეგ მალევე წყვილი ლაშქრობაში ერთად წავიდა. თუმცა, მათი ურთიერთობის გადარჩენა უკვე შეუძლებელი იყო.

„დიდი მწუხარებით და დამძიმებული გულით უნდა გამოვაცხადო, რომ ეშტონთან ჩემი ექვსწლიანი ქორწინება დასრულდა.” – თქვა დემიმ 2011 წლის 17 ნოემბერს E! News-თან საუბრისას.

ამის შემდეგ განქორწინების 2-წლიანი პროცესი დაიწყო. ეშტონი, რომელსაც უკვე მოღალატის სტატუსი ჰქონდა, ცოტახნით საჯარო სივრციდან მიიმალა. დემი მური კი ხმაურიან წვეულებებს ესწრებოდა და ყველას ყურადღებას იპყრობდა. ქალიშვილები განსაკუთრებით ნერვიულობდნენ, თუმცა დემის არაფრის შეცვლა სურდა.

2012 წელს მსახიობი ნარკოტიკული საშუალების ზედოზირებით საავადმყოფოში აღმოჩნდა და ძლივს გადაარჩინეს. პარალელურად, კარიერაში სრული კრახი ჰქონდა და ჯანმრთელობის პრობლემებიც შეექმნა. დემი მური კონკრეტულ დიაგნოზს არ ასახელებს, თუმცა ამბობს, რომ მაშინ მისი სხეული ძალიან შეიცვალა.

ქალიშვილების დახმარებით, დემი მურმა ფსიქოლოგებთან, სპეციალისტებთან სიარული დაიწყო და კვლავ წამოდგა ფეხზე. ამერიკულ Harper’s Bazaar-თან ინტერვიუში გაამხილა, რომ თოჯინებს აგროვებს და რამდენიმე სათამაშო ჩანთით სულ დააქვს. მისი თქმით, ეს ჩვევა ეშტონს არ უკავშირდება და ბრიუს უილისთან განქორწინების შემდეგ დაეწყო.

“მიყვარს ეს პატარა ნივთები. ისინი მეხმარებიან, რომ ცხოვრებას ძალიან სერიოზულად არ მოვეკიდო.” – ამბობს მური. მას კიდევ ერთი ჰობი აქვს – მკვდარი ცხოველების ფიტულებს აგროვებს..

…62 წლის ასაკში დემი მური შესანიშნავად გამოიყურება. მისი კარიერა კვლავ გააქტიურდა და მსახიობს რამდენიმე ახალ პროექტშიც ვიხილავთ. ძალიან კარგი დედა, ბებიაა, მეგობრობს ყოფილი მეუღლის, ბრიუს უილისის ოჯახთან, ესწრება სხვადასხვა ღონისძიებას და თაყვანისმცემლების ყურადღებას ყოველთვის იპყრობს.