„წლევანდელი საპროგნოზო მონაცემებით 40-45 ტონა მანდარინს ავიღებთ, რაც სტანდარტულად კარგ მოსავალს ნიშნავს“ – ამის შესახებ „ბიზნესპრესნიუსთან“ ციტრუსის საკოორდინაციო შტაბის უფროსმა, რაულ თავართქილაძემ განაცხადა.
მისი თქმით, მანდარინის ექსპორტზე გატანა წელს ძირითადად პოსტსაბჭოთა ქვეყნებსა და დასავლეთ ევროპის რამდენიმე ქვეყანაში იგეგმება, თუმცა ამ ეტაპზე კონკრეტული მოცულობის და ქვეყნების თქმა, მისი თქმით, რთულია.
„რაც შეეხება არასტანდარტულ მანდარინს, წელს ორი საკონსერვო ქარხანა იმუშავებს მის ჩასაბარებლად, შარშან ერთი იყო. არასტანდარტული მანდარინი ჩასაბარებელი არ დარჩება და ორივე ქარხანა სრული დატვირთვით მიიღებს, მოხდება გადამუშავება და შემდეგ საზღვარგარეთ გატანა“, – განაცხადა რაულ თავართქილაძემ.
როგორც საკოორდინაციო შტაბის ხელმძღვანელმა აღნიშნა, მთავრობის გადაწყვეტილებით არასტანდარტულ მანდარინს წელს მთავრობა 40 თეთრად ჩაიბარებს, საიდანაც 35 თეთრ იხდის აჭარის მთავრობა, ხოლო 5 თეთრს ის საკონსერვო ქარხანა, რომელიც ჩაიბარებს.
„რაც შეეხება ჩვეულებრივი მანდარინის ფასებს, მას ბაზარი არეგულირებს. ჯერჯერობით 1 კილოგრამს ექსპორტიორები 80-90 თეთრად იბარებენ. შტაბის მისიაც სწორედ ის არის, რომ მაქსიმალურად ხელი შევუწყოთ პროდუქციის რეალიზაციასა და სხვა ბიუროკრატიულ დეტალებს. აქტიურად მუშაობს ჩვენი ცხელი ხაზი და მაქსიმალურად ვეხმარებით ფერმერებს ყველაფერში“, – აღნიშნა რაულ თავართქილაძემ.
