OpenAI-მ ხელოვნურ ინტელექტზე დაფუძნებული ახალი საძიებო ინსტრუმენტის პროტოტიპი დააანონსა, რომლის სახელწოდებაც “SearchGPT”-ია. ამის შესახებ კომპანიის ვებგვერდზე გამოქვეყნებულ განცხადებაში წერია, რასაც Financial Times ავრცელებს.

გამოცემის შეფასებით, OpenAI-ის ახალი ინსტრუმენტი “Google-ის პირდაპირი გამოწვევაა,“ რომლის საძიებო სისტემა ბოლო 20 წლის განმავლობაში დომინირებს და რომელმაც გასულის წლის მაისში განაცხადა, რომ საძიებო სისტემაში გენერაციულ AI-ტექნოლოგიებს გამოიყენებდა.

OpenAI-ში აცხადებენ, რომ SearchGPT მომხმარებელს “სწრაფ და დროულ პასუხებს გასაგები და რელევენტური წყაროებიდან გასცემს.”

პირველ ეტაპზე საძიებო სისტემა მომხმარებელთა მცირე ჯგუფისთვის იქნება ხელმისაწვდომი. Financial Times-ის ცნობით, 25 ივლისს კომპანიამ სერვისის დასატესტად 10,000 ადამიანის მოლოდინის სია გახსნა. შემდგომში კომპანია საძიებო სისტემის ზოგიერთი ფუნქციის პირდაპირ ChatGPT-ში ინტეგრირებას აპირებს.

ვიზუალურად ახალი ინსტრუმენტი ChatGPT-ისგან განსხვავდება, რადგან ერთი გენერირებული პასუხის ნაცვლად SearchGPT მომხმარებლებს მრავალ ბმულს შესთავაზებს, რომლებიც გარე ვებსაიტებზე გადავა. ამასთან, მომხმარებლები შეძლებენ, სისტემას დასაზუსტებელი კითხვები დაუსვან, ხოლო „ყოველ მოთხოვნაზე საერთო კონტექსტი დაგროვდება.“